 |
| சகலகலாவல்லிமாலை |
குமரகுருபரர் அருளிய சகலகலாவல்லிமாலை
சகலகலாவல்லிமாலை
வெண்டா மரைக்கன்றி நின்பதந் தாங்கவென் வெள்ளையுள்ளத்
தண்டா மரைக்குத் தகாதுகொ லோசக மேழுமளித்
துண்டா னுறங்க வொழித்தான்பித் தாகவுண் டாக்கும்வண்ணம்
கண்டான் சுவைகொள் கரும்பே சகல கலாவல்லியே.
நாடும் பொருட்சுவை சொற்சுவை தோய்தர நாற்கவியும்
பாடும் பணியிற் பணித்தருள் வாய்பங்க யாசனத்திற்
கூடும் பசும்பொற் கொடியே கனதனக் குன்றுமைம்பாற்
காடுஞ் சுமக்குங் கரும்பே சகல கலாவல்லியே.
அளிக்குஞ் செழுந்தமிழ்த் தெள்ளமு தார்ந்துன் னருட்கடலிற்
குளிக்கும் படிக்கென்று கூடுங்கொ லோவுளங் கொண்டுதெள்ளித்
தெளிக்கும் பனுவற் புலவோர் கவிமழை சிந்தக்கண்டு
களிக்குங் கலாப மயிலே சகல கலாவல்லியே.
தூக்கும் பனுவற் துறைதோய்ந்த கல்வியுஞ் சொற்சுவைதோய்
வாக்கும் பெருகப் பணித்தருள் வாய்வட நூற்கடலும்
தேக்குஞ் செழுந்தமிழ்ச் செல்வமுந் தொண்டர்செந் நாவினின்று
காக்குங் கருணைக் கடலே சகல கலாவல்லியே.
பஞ்சப் பிதந்தரு செய்ய பொற்பாதம் பங்கேருகம் என்
நெஞ்சத் தடத்து அலராது என்னே நெடுந்தாட் கமலத்
தஞ்சத் துவசம் உயர்த்தோன் செந்நாவு மகமும் வெள்ளைக்
கஞ்சத்தவி சொத்திருந்தாய் சகல கலாவல்லியே.
பண்ணும் பரதமுங் கல்வியுந் தீஞ்சொற் பனுவலும்யான்
எண்ணும் பொழுதெளி தெய்தநல் காயெழு தாமறையும்
விண்ணும் புவியும் புனலுங் கனலும்வெங் காலுமன்பாடி
கண்ணுங் கருத்து நிறைந்தாய் சகல கலாவல்லியே.
பாட்டும் பொருளும் பொருளாற் பொருந்தும் பயனுமென்பாற்
கூட்டும் படிநின் கடைக்கணல் காயுளங் கொண்டுதொண்டர்
தீட்டுங் கலைத்தமிழ்த் தீம்பா லமுதந் தெளிக்கும்வண்ணம்
காட்டும்வெள் ளோதிமப் பேடே சகல கலாவல்லியே.
சொல்விற் பனமு மவதான முங்கவி சொல்லவல்ல
நல்வித்தை யுந்தந் தடிமைகொள் வாய்நளி னாசனஞ்சேர்
செல்விக் கரிதென் றொருகால முஞ்சிதை யாமைநல்கும்
கல்விப் பெருஞ்செல்வப் பேறே சகல கலாவல்லியே.
சொற்கும் பொருட்கு முயிராமெய்ஞ் ஞானத்தின் தோற்றமென்ன
நிற்கின்ற நின்னை நினைப்பவர் யார்நிலந் தோய்புழைக்கை
நற்குஞ் சரத்தின் பிடியோ டரசன்ன நாணநடை
கற்கும் பதாம்புயத் தாயே சகல கலாவல்லியே.
மண்கண்ட வெண்குடைக் கீழாக மேற்பட்ட மன்னருமென்
பண்கண் டளவிற் பணியச்செய் வாய்படைப் போன்முதலாம்
விண்கண்ட தெய்வம்பல் கோடியுண்டேனும் விளம்பிலுன்போற்
கண்கண்ட தெய்வ முளதோ சகல கலாவல்லியே.
-குமரகுருபரர்
சரஸ்வதி பூஜையும் நவராத்திரியும்
- நவராத்திரி என்பது சக்தியின் மகிமையைப் போற்றும் வகையில் ஒன்பது நாட்கள்அனுஷ்டிக்கப்படும் விரதமாகும். இவ்விழாவில் ஆதிபராசக்தியின் மூன்று திருவடிவங்களான ஸ்ரீ துர்கா தேவி, ஸ்ரீ லட்சுமி தேவி, ஸ்ரீ சரஸ்வதி தேவி ஆகியோர் வழிபடப்படுகின்றனர்.
- முதல் மூன்று நாட்கள் – ஸ்ரீ துர்கா தேவி: தீமைகளை அழித்து, தைரியம், வீரம், மனவலிமை ஆகியவற்றை அருள்பவள்.
- அடுத்த மூன்று நாட்கள் – ஸ்ரீ மகாலட்சுமி: செல்வம், வளம், செழிப்பு மற்றும் மங்கள வாழ்வை அருள்பவள்.
- இறுதி மூன்று நாட்கள் – ஸ்ரீ சரஸ்வதி தேவி: கல்வி, ஞானம், கலைகள் மற்றும் அறிவாற்றலை அருள்பவள்.
- இந்த சரஸ்வதி பூஜையுடன் விஜயதசமியும் இவ்வழிபாட்டில் சிறப்பிடம் பெறுகின்றது. நவராத்திரியின் பத்தாவது நாளாகக் கொண்டாடப்படும் புனிதத் திருநாளே விஜயதசமி. தீமையை நன்மை வென்றதையும், அறியாமையை அறிவு வென்றதையும், இருளை ஒளி வென்றதையும் உணர்த்தும் சிறப்புமிக்க நாளாகும்.
வித்யாரம்பம்: குழந்தைகளின் கல்விப் பயணத்தைத் தொடங்குவதற்கும், புதிய கலைகள் மற்றும் திறன்களைக் கற்றுக்கொள்ளத் தொடங்குவதற்கும் விஜயதசமி மிகவும் மங்களகரமான நாளாகக் கருதப்படுகிறது. ஏற்கெனவே கற்ற கல்வியை வளர்த்து, புதிய முயற்சிகளைத் தொடங்கும் நாளாகவும் இந்தாள் மிளிர்கின்றது. - சகலகலாவல்லி மாலை:நவராத்திரி விரத நாட்களில் கலைவாணி சரஸ்வதி தேவியின் அருளைப் பெற, குமரகுருபர சுவாமிகள் அருளிய சகலகலாவல்லி மாலையை காலையும், மாலையும் பாடி வழிபடுவது சிறப்பானதாகக் கருதப்படுகிறது. அத்தோடு அபிராமி அந்தாதியும் பாடுவது மிகவும் சிறப்பானதாகும். கீழே இறுதியாக அபிராமி அந்தாதி இணைக்கப்பட்டுள்ளது.
📚 மற்றைய பாடல்கள்
மற்றைய பாடல்களை முழுமையாகப் பெற பின்வரும் பொத்தான்களை அழுத்துக
கருத்துகள் இல்லை:
கருத்துரையிடுக